Prof. Dr. Nesrîn Fexrî  koça dawîyê kir!!!

Aso Zagrosi

Dr. Nesrîn Fexrî ,  rewşenbîr, zimannas,  wêjenas û bi kurtî zanayeka hêja  a Kurdistanê bû.  Wê gellek xizmetên  bi nirx û hêja ji bo çand, ziman û wêjeya  Kurdî kirin.

Dr. Nesrîn Fexrî,  li 27ê  Qanuna Yekem  1937ê li taxa Sabunkeran li bajêrê Silêmanî  ji dayîk bû. Malbata wê  malbatek rewşenbîr û Kurdperwer bû.    Bavê Nesrînê  di artêşa Iraqê de efser bû.    Ji ber vê yekê jî  piranîya bajêrên Kurdistanê  û Iraqê  digerîyan. Nesrînê  li Kerkûkê, li  Hewlêrê û li Bexdayê  piranîya qonaxên xwandina  xwe tewawkir û  di sala 1959 de  bakaloryasa xwe  bi pileya  şeref li ser ziman û wêjeya Erebî  li  Zankoya Bexda  ji beşê  wêjeyî bidest anî.

Nesrîn Fexrî, di naverasta salên şestan a sedsala bîstan de  ji bo berwamkirana xwendina xwe  çû ji bo Yêkîtîya Sovyetê  û li bajêrê Bakûyê  dest bi xwendina xwe kir.  Her çiqas  li Zankoya Bexdayê  bakaloryosa wê li  ser  ziman û wêjeya Erebî bû,  wê  doktora xwe li ser  „Ferman  di herdu şêwezarê  Kurmancîya Jêrê û Jorê de“ kir û serketî bû.  Ev yekem car bû  kesekî li ser vê  babetê  doktora bi dest anî.

Dr. Nesrîn Fexrî, piştî  ku   bi destxistina doktora xwe  wegerîya  ji bo Bexdayê û di koleja  Wêje, Perwerde û ziman de   wekî mamoste  dest bikar kir. Wê xizmetek gellek baş  ji bo ziman û  wêjeya Kurdî kir û bi pileya zanistî bû profesor..  Sedan xwendekarên Kurd,  li jêr rêvebirîya wê de  bakaloryos, master û  doktorayên xwe  bi dest xistin.

Dr. Nesrîn Fexrî, xwedana pênivîsek rengîn bû û ji bo ziman, wêje û helbesta Kurdî karên gellek hêja kir.   

Dr. Nesrîn Fexrî xwedana 40 berhemên çapkirî û destnivîsên  ne çapkirîye.  Wê 11 pirtûk bi zimanê Kurdî çapkir.  12 pirtûkên wê bi Kurdî   destnivîsin hêj nehatine çapkirin.  Wê 10 pirtûk jî bi zimanê Erebî çapkir û  3 pirtûkên wê jî  hêj nehatine çapkirin.   Ji bilî van berheman  Dr. Nesrîn Fexrî  4 dîwanê helbestan jî çapkirîye. Dr. Nesrîn Fexrî,  sedan gotar û lekolînên zanistî  di rojname û kovarên Kurdî û Erebî de  weşandîye . Dîsan Dr. Nesrîn Fexrî, wekî rewşenbîreka Kurd  dewreke mezin wekî damêzrêner  di avakirina Kora Zanyarîya Kurd û YêkîtîyaNivîskarên Kurd  de lîst.  Ew endama damêzrêner  a van herdu sazîyan bû.  Dr. Nesrîn  endama lijneya  danana pirtûk û bernameyên xwendinê li  Wezareta Perwerde bû. Wê demekê jî  di radyoya  Kurdî û Erebî de kar kir û dewsa wê   wê demê gellek dîyar bû.

Sed heyf û mixabin,  pirtûkxana  bi nirx a  Dr.  Nesrînê hate sûtandin û gellek  berhemên giranbuha  li nav çûn.  Dr. Nesrîn Fexrî, pirtûkxaneû berhemên xwe pêşkêşî   Bingeya Jînê kir. Berpirsên Bingeha Jînê dixwazin  hemû berhemên wê di  paşerojê de  çap û belawbikin. Dr. Nesrîn Fexrîyê  di gellek kongre û konferansên navxweyî û derveyî welêt de beşdar bû û  çend  xelatên rêzgirtinê jî wergirtîye.

Di çavpêketinê  de  ligel K24  de   Dr. Nesrîn dibêje   gellek riqa min li  peyîva  xanenîşînê ye  ,  “ez xanenîşîn nînim xaknîşînim heta mirinê  xizmeta gelê xwe dikim.  Ez hez ji bîna  axê a piştî baranê dikim, ku niha  ew bîn jî nemaye”

Dr. Nesrîn Fexrî,   li roja 11.10.2018  li bajêrê  Silêmanî  koça dawîyê kir  û li goristana Girdî Seywan, li kêleka nemiran  li xak hate spardin.

PS: Kurteya  gotara Xelîl Abdullah, „Dr. Nesrîn Fexrî, Zanaya Zimanwanî“

10.11.2018